Vistas de página en total

viernes, 24 de diciembre de 2010

Arfueyu


L´arfueyu yera una planta considerada máxica pelos antiguos druídes celtes. Teníen el vezu de cortalu´l primer día de lluna nueva y nun podíen facelo con nengún preséu de fierro. Por mor d´ello usaben una foceta d´oru. La planta enxamás podía tocar el suelu y cuando la garraben echábenla nuna sábana blanco. El raigañu d´esta planta enxamás toca la tierra y tampocu se sostién por si mesma nel aire. L´arfueyu más apreciáu pelos antiguos celtes yera´l que medraba nos texos por ser esti´l so árbol sagráu. Esta tradición llega viva hasta los nuestros díes. Muncha xente piensa que, como too, ye una tradición que vien de los EE.UU. y nada más lloñe de la realidá. En Perlora los más vieyos alcuérdense de dir buscar l´arfueyu y ponelu enrriba la puerta. Dalgunos tovía lo faen. El día que había que dir garralu ye´l 13 d´avientu, día de Santa Llucía. Esto coméntenmelo unos cuantos paisanos. Nun ye casualidá que seya´l día de la lluz (Llucía significa lluz). Ye vezu n´Asturies y en más países cuando llega dalguién a casa da-y dos besos pa recibilu na mesma entrada. D´ehí vien la tradición qu´entemez l´arfueyu y los besos navidiegos. Cuando llegaba´l día de la foguera de San Xuan tiraben la rama d´arfueyu ya seco al fuéu pa purificar la casa y les tierres de llabor. Si-yos preguntes por qué lo faen nun te lo saben dicir. La respuesta más común ye que lo vieron facer a los pás y a los güelos. Viendo la fiebre consumista de los caberos años pol arfueyu veo que siguimos garrando tradiciones nuestres pensando que son foriates porque mos lo venden pela tele. Somos fatos de remate.


Arfueyu


La güelina y el nietu
La güelina dándo-y l´arfueyu al nietu, tresmitiéndo-y milenios de tradición

sábado, 11 de diciembre de 2010

Qvo vadis Asturies

Pongo la tele y apaez encesa nun canal cualisquiera de los que se ven n´Asturies. Vamos poner que se llama, por exemplu Telecirco, y lo primero que los mios güeyos acierten a ver ye la siguiente escena. Tan sentaos nunes silles les siguientes persones: el delincuente nomáu popularmente "El Dioni", l´asesina nomada tamién con cariñu "la Dulce Neus" y una tal Loly Álvarez. Esta imaxen déxame ablucáu y casi ensin respiración pero nun acaba equí la cosa. La charra, moderada por un famosu presentador miembru del lobby qu´angüaño domina esa cadena y tres cuartos del estáu, ta basada no que les tres figures tienen en común ente elles mesmes y nun ye otra cosa que la so relación col ex-abogáu fugáu de la xusticia Rodríguez Menéndez qu´al parecer sábese que ta pa l´Arxentina. Nun aguanto más d´un minutu porque´l cuerpu ruémpeme a sudar y camudo de canal. Casi ensin atinar primo un botón al debalu. Salme un programa de nome DEC y lo primero qu´oigo ye: ¿TE PREGUNTO QUE SI LES VISTES? (la traducción d´esta frase en llingua belenestebaniana al castellán sedría: ¿TE PREGUNTO QUE SI LOS VISTE?). Esto ye muncho pa´l body como diríen los guah.es d´agora. Apago la caxa boba y salgo a tomar l´aire frescu de la xelada mientres albidro coses y me faigo entrugues. ¿La xente tragará tolo que-y echen? ¿De verdá verán la televisión? ¿Hasta onde vamos llegar sinón conocemos el mayor ríu d´Asturies o la capital de Francia pero si les veces que va cualisquiera d´estos personaxes al serviciu durante´l día? Qvo vadis Asturies?

jueves, 2 de diciembre de 2010

Les mentires de la II República

Ye vezu ente los asturianistes comunistes, paez ser que pa ser asturianista hai que ser comunista nun puedes ser de centru o de dereches o namái asturianista porque entós ya nun yes asturianista yes "facha" según ellos, bonu a lo que vamos, ye vezu ente ellos, glayar al altu la lleva les bondaes de la II República pa con Asturies. Como si aquello fuere l´Arcadia perdida o una especie de paraísu onde les señes d´identidá asturianes campaben a les sos anches. Yo voi dicir esactamente lo contrario. La II República fue una disgracia p´Asturies. El plan d´educación de la II República Española ye´l principiu de la autodestrución que mos autoimponemos los asturianos. La República metió n´Asturies y na vecina Galicia a mayestros castellanos que reprimíen a too´l que nun falara en "cristiano" o seya en castellano. Esto en Galicia nun trunfó y por eso conserven les sos señes d´identidá pero n´Asturies sí. N´Asturies foi calando la idea de que falar asturianu yera falar aldeano y "paleto". Cuando llegó Franco ya nun tuvo nada que reprimir yá nos encargamos nosotros d´autorepriminos, d´autodestruír la nuestra seña d´identidá más importante, la llingua. Y mira que mos reímos de los gallegos por incultos y por ignorantes. Oxalá-yos llegáramos, en cuestiones identitaries, a la suela los zapatos.

jueves, 25 de noviembre de 2010

Quimarán, El Pieloro y los vecinos

El conceyu Carreño tien 12 parroquies que son: Albandi, Ambás, Candás, Carrió, El Pieloro, El Valle, Llorgozana, Perlora, Prevera, Priendes, Quimarán y Tamón.
Asina por estos nomes se conocieron siempres. Mio güela natural d´El Parruchu en Llabio parroquia de Perlora y con 78 maraviosos y bien llevaos años siempres les llamó asina, oseya, pol so nome. Llámame l´atención fonderamente la polémica qu´un periódicu que se vende n´Asturies, porque non lo escaezamos non esisten periódicos asturianos son toos de capital foriatu, ta avivando col nome de dos parroquies que son Quimarán y El Pieloro. La razón que se da dende´l periódicu y dende l´alministración del conceyu ye que los vecinos non aceuten la nueva denominación y quieren camudala a la vieya de "Guimarán" y "Piedeloro" cuando en realidá esa ye la nueva y la vieya ye la otra. Lo que más destaca nesta historia ye que los vecinos que piden la torna al nome castellanizáu son dos, concretamente, los presidentes de les asociaciones de vecinos. Éstos escúdense en que representen a tolos vecinos, los de toles cases y amás nos dos casos, que casualidá, tan averaos a determináu grupu políticu. A mí resúltame, polo menos, curiosu. Yo voi plantear otres cuestiones: si los vecinos quieren dexar de pagar impuestos na parroquia de Carrió porque son la fastera más contaminada d´Europa por culpa la térmica y la cementera, ¿va llevase a Plenu y debatise?; si los vecinos de Perlora quieren independizase de Carreño porque casi nun esisten como pueblu porque l´Ayuntamientu da-y más privilexos a la cantera de Tudela Veguín que come más de la metá de la parroquia y porque la Ciudá Residencial ta nun estáu d´abandonu vergoñosu, ¿van atendese les sos reivindicaciones y da-yos la independencia? Son coses que pasen en Carreño que como hai plenu emplegu pues hai que buscar daqué colo qu´entretenese.

jueves, 18 de noviembre de 2010

Fabes con amasueles (con mariscu)

Una recetuca prestosa de la qu´angüaño llamen "cocina de nueva espresión" y que la mio güelina, nun se si tien nueva espresión pero lo que sí se ye que s´espresa perbien, fízola tola vida.

INGREDIENTES

Fabes (1 kilu)
Amasueles (1 kilu)
Andariques (3 ó 4, según el gustu del cocineru/a)
Fariña
Perrexil
Vinu blancu
Sal
Agua
Aceite
Ayu

PREPARACIÓN

Lo primeru de tóu poner les fabes a remueyu unes 12 hores enantes de cocinales, lo meyor ye, la nueche anterior.
Echamos nuna pota les fabes con agua (que les cubra por enrriba) y ponémosles a cocer. Esperamos hasta que veamos que tean blandes (aprosimadamente ente una hora y media y dos hores, depende del tipu de faba) y echamos el sal y si queremos echar pataques echámosles tamién agora.
Aparte, mientres cuecen, picamos l´ayu y el perrexil y echámoslo nuna sartén con aceite, añadimos tamién una migaya fariña, un chorrín de vinu blancu y un pocu d´agua (una salsa verde ye lo que facemos).
Echamos too´l conteníu de la sartén na pota les fabes. Partimos les andariques en cachinos enrriba un platu y echámosles tamién p´allá xunto coles amasueles; el líquidu que sal al partir les andariques tamién pala pota (da-y sabor mariñán). Dexámoslo cocer too ente 10 y 15 minutos (hasta qu´abran les amasueles). Caproveche.

Conseyos

Podemos echa-y tamién unes pataquines que-y den sabor y cualquier tipu de mariscu como ñocla, centollu, llangostinos y yá lo másimo sedría llangosta o bugre (depende de lo que queramos gastar).

Tamién recomiendo que les fabes seyan del mesmu tipu pa queden nel mesmu puntu toes. Si son de dos tipos diferentes unes pueden quedar bien pero otres pueden quedar dures porque necesiten más coción y si les cueces más desmigayes les otres.

Les fabes, tanto éstes como la fabada con compangu, saben meyor d´un día pa otru por qu´el caldu posa y engorda. Esto siempres lo dicen les vieyes y sabies cocineres o cocineros.

Fabes a remueyu

Fabes yá cocíes


Ayu y perrexil picaos


Echándo-y les pataques


Amasueles y andariques


Echando les andariques


Preparando la salsa verde


Echando la salsa verde


Echando les amasueles


Pota fabes yá lista pa comer


Platín de fabes






viernes, 12 de noviembre de 2010

La sidra y la conceyala d´urbanismu

Agora tóca-y a la sidra. Recomiéndovos lleer con atención esti artículu que vos dexo equí debaxo
http://www.lne.es/mar-campo/2010/11/11/sidra-asturiana/992912.html
Llámame l´atención los comentarios y les opiniones de la xente tan descomanaos y cola boca tan grande echando contra los vascos y contra tolo que se ximielga. Non, non, non. La culpa nun ye de los vascos. Ellos faen bien. Tiren polo d´ellos y nosotros lo que facemos, como siempres, ye esperar a que venga dalguién a sacanos les castales del fuéu, nesti casu les mazanes ya pue ser "papá Estáu" o "papá Principáu" y eso nun va pasar porque esa dómina, por muncho que s´empeñen determinaos sectores de la sociedá anclaos nel pasáu por determinaos intereses partidistes y personales en que nun seya asina, ya finó. La sidra ye una industria que, n´Asturies, da trabayu directu a más de 9.000 persones pero namás que mos preocupamos d´ella cuando apaecen noticies como esta o cuando queremos tomar un culín el domingu a la hora´l vermú. Pero nun ye namás cola sidra ye con tóu y, claro, asina mos va. Tovía m´alcuerdo esti branu pasáu como la conceyala d´urbanismu de Carreño prohibió escanciar sidra na cai, nes terraces porque golía y daba mala imaxen pa los turistes. Naide protestó quitando un garrapiellu d´hosteleros. Ye más había xente que-y daba la razón nun perconocíu programa de la TPA. Recuérdovos la seña d´identidá númberu dos de los asturianos: la imbecilidá. La unu ye la autodestrucción y vamos percontentos camín d´ella, eso sí, por culpa de los vascos.

jueves, 11 de noviembre de 2010

La navidá especial

Llevantose rutiando y con un saboruzu amargu na boca del chicolate con pastes que tomare depués de la cena. Tenía ardor d´estómadu y alcontrábase mal. Pero taba contentu porque yera´l meyor día del añu, el día esperáu por él durante los otros trescientos sesenta y cuatru. Calzó les botes negres que, talamente, paecíen de paramilitar, los pantalones y la chamarra bermeyos y salió del cuartu. Llegó a la cocina y preparó un bon almuerzu compuestu de pasteles de mora y miruéndanos, tarta mazana y una xarrona enforma grande de chicolate. Bebía paparaos mientres y cayíen pela barba blanca como la nieve virxen dos ríos negros que díben-y a xuntase nel focicu y formaben una gota que-y aterrizaba nel bandullu onde se-y taba formando una mancha con aspeutu de nube de turbón. Acabáu l´almuerzu llevantose, garró la escopeta que tenía detrás de la puerta, la canana enllena cartuchos, punxo´l gorru, tamién bermeyu, y salió pala cai en direición a la corte. Taba frio y nevaba como yera vezu neses feches asina qu´entainó´l pasu. Llegó a la corripa y garró la llista de los neños malos mientres preparaba´l trinéu. Esti añu diben tener una navidá mui especial.


'Sint'

viernes, 5 de noviembre de 2010

Fritos de calabaza

Voi poner la receta de los fritos de calabaza que fai mio güela y que facíen la madre y la güela de mio güela. Solíen facelo pa Tolosantos, pa Navidá y p´Antroxu y depués cuando cuadraba pero nestes tres feches siempres.

INGREDIENTES

Calabaza (una calabaza piquiñina pero depende de los que queramos facer)
Anís
Canela en polvu
Güevos
Zucre
Sal
Fariña
Agua
1 llimón
Formientu

PREPARACIÓN

Pelamos la calabaza y partímosla en cachinos cuadraos. Echámoslo nuna pota con agua y una migaya sal y ponémoslo a cocer. Mientres cuez vamos desmigayándolo con un tenedor hasta que veamos que la masa vaya tando blando (aprosimao 20 minutinos).
Depués de que te cocía pasar la masa pol pasapuré. Una vegada qu´acabemos de facelo echámos-y el zucre (al gustu de cada ún, aprosimao mediu kilu pa los llambiones), una cuyarada de canela, dos o tres güevos, un chorrín d´anís, la ralladura y el zumu d´un llimón y mediu sobre de formientu. Mientres vamos echando toes estes coses removemos a la vez la masa con un tenedor o cuyar de madera.
Echamos agora la fariña mientres siguimos batiendo hasta que veamos que la pasta tea dura y la podamos echar a cuyaraes nuna sartén.
Ponemos una sartén al fuéu con aceite y cuando esti tea bien caliente vamos echando la masa a cuyaraes. Cada cuyarada ye un fritu. Cuando tea bien doradino pelos dos llaos sacámoslo y vamos faciendo la mesma maniobra hasta que finemos cola masa.
Cuando tean tolos fritos fechos echámoslos nuna fonte o pota y espardémos-yos per enrriba zucre. Caproveche.
Calabaza piquiñina cola que se fizo. Echose la mitá

Pelando la calabaza

Partiéndola en cuadradinos

Echándo-y agua

Esmigayándolo col tenedor mientres cuez

Pasapuré

Cuando acabemos col pasapuré echamos los güevos, canela, anís, ralladura y zumu de llimón

Echando´l zucre

Echamos la fariña y el formientu y vamos removiéndolo


Resultáu final depués de remover la masa hasta que mos quede durina

Faciendo los fritos

Sartén colos fritos dorando

Pota colos fritos ya col zucre por enrriba

Un fritu solu

jueves, 4 de noviembre de 2010

La mio güelina y el "Hallowen"

Nun lo pude evitar. Nesti mundu tan tan globalizáu yá nun puedes controlar nada. Nin a les güelines antañu tan entrañables. Angüañu tan espabilaes y "al día" con xente del más altu cumal intelectual como Jorgejavi, Carmele, Jordi, la Rahola o´l Sopena. Sinón mirái la mia como se punxo depués de tar viendo´l canal temáticu de "La princesa del pueblo del Barrio de San Blas" onde aconseyaron qu´había que festeyar "Hallowen" y antroxase de bruxa


domingo, 31 de octubre de 2010

Hallowen non, Tolosantos o Samain sí


Los asturianos con una de les nuestres señes d´identidá más valoratibles como ye la fatura somos mui daos a recibir colos brazos abiertos a lo foriato y echar por tierra y desprestixar lo de nueso. Eso nun podía ser menos col "Hallowen" norteamericanu. Vayas per onde vayas tenemos "Hallowen". Bombones, calabaces, antroxos, mázcares, bragues, camisetes, tangues, llinternes y una llarga llista de coses de lo más bayuroso cola marca´l Tíu Sam. Pero equí salionos el tiru pela culata. El "Hallowen" nun ye más qu´el Samain celta, la fiesta de Tolosantos que se vien cellebrando n´Asturies dende tiempos inmemoriales. Pa entamar el "Hallowen" llevámoslo a lo qu´angüaño son los Estaos Xuníos de Norteamérica los emigrantes asturianos (sí los asturianos) y los irlandeses y agora lo que faen los americanos ye vendelu al mundu cola so visión particular. Ye abondo curioso, y enforma xente nun sabe, que la tradición de la calabaza ye asturiana n´esclusiva porque n´Irlanda lo que vaciaben yeren nabos y esto puede vese nidiamente na lleenda irlandesa de Stingy Jack que depués derivó en Jack O´Lantern o Jack el Llinterna. Mio güela cúntame, y nun ye d´una braña perdida en casa dios ye d´El Parruchu en Llabio parroquia de Perlora nel conceyu Carreño, que vaciaba calabaces colos vecinos y collacios y poníenles na quintana y nos cruces de los caminos. Vaciábenles bien, sacaben les mayores y meyores pepites pa semales o pa poneles al sol a secar y xintales, facien-yos unos buracos pa los güeyos, les ñarres y la boca. Depués nel de la boca poníen les propies pepites de la calabaza o palucos pequeños que facíen de dientes. Coles barbes del maíz podíen pone-y, si tiníen gracia, un bigote o na parte d´arriba de la calabaza unes trences, coletes o pelos desordenaos pa que diere más miéu. P´acabar metíen veles en dientro. Lo qu´avezaben comer de llambionada nestes feches yeren los "fritos de calabaza", casadielles, frixuelos y tamién, por supuestu, amagostaben castañes. Tamién avezaben a facer, igual que l´alborada´l día San Xuan, trastaes a los vecinos como camudar les portielles de sitiu, guardar los carros, etc. Tiníen tamién especial precuru en nun topase cola "Güestia" qu´esa nueche taba pasiando pelos montes y caleyes. De lo de los antroxos nun s´alcuerda bien y tampoco d´echar agua y comida a los difuntos pa que pasen de llargu y nun lleven a naide de la casa pero diz que dalgo-y suena. Voi siguir intentando que faiga memoria pero mientres tantu podemos siguir coles patoxaes hallowanianes.

sábado, 16 de octubre de 2010

Señes d´identidá

L´otru día tuve tomando un cafetín y almorzando con un collaciu que lleva munchos años trabayando por esta tierra, por esti benditu país. Ente paparáu y paparáu y taragañu y taragañu díbemos comentando coses personales de les nuestres vides y tamién falábamos de la situación política, social y cultural del mesmu. Nun intre de la charra salió la tema de les señes d´identidá de los asturianos y él díxome qu´había dos que destacaben por enrriba de les demás que son: la imbecilidá y la gochería. La imbecilidá ye una seña percaracterística dicía. Non hai más que ver como se apondera lo de fuera y se tira por tierra lo nuestro. Non hai más que ver como somos los más asturianos, los más grandones fuera de les nuestres llendes y lo nuestro ye lo meyor y, ensin embargu,  cuando tamos equí nin siquiera miramos pa ello. Yo escuchaba y asentía cola tiesta. Taba y toi d´álcuerdu con él dafechu. La gochería ye otra dixo. En cualisquier pueblu que pasé un ríu pel mediu lo que faen ye tenelu como un coral de llimpio, fáin-y un paséu curiosu, ígüenlu, adecéntenlu, les cases miren pal ríu y esfruten d´él y si te fixes bien dicíame él, eso equí nun pasa. Yo siguía asintiendo. Equí tiramos tola mierda al ríu, la parte d´alantre de les cases da pala cai y la trasera pal ríu pa nun ver la nuestra propia mierda. Cuando ya lu tenemos que nun puede con tola basoria que lleva tapámoslu y llamámoslu "canalizar" pa nun ver la llamuerga. Anque sepamos que sigue ehí queremos meyor nun lo ver como les avestruces. Yo namái que podía da-y la razón. Tien tola razón del mundu y más pa con ello tovía. Pero yo voi amestar otra seña identitaria más aparte de la imbecilidá y la gochería y ye l´autodestrucción. Los asturianos somos capaces d´autodestruínos como lo tamos faciendo y lo que ye más grave sabiéndolo. Sabemos qu´el camín que llevamos namái que nos lleva al estermín y non ye que sigamos por él ye que lu garramos con mas fuercia tovía. Somos capaces d´ello y vamos consiguilo nun tardando muncho. Venga a por ello.

miércoles, 13 de octubre de 2010

Requexos máxicos de Perlora

                                           Regatu que naz de la Fonte Friera
                                           Cartelu del topónimu de Friera
                                           Biesca
                                           Fonte Friera
                                          Cañu la fonte
                                          Lepiota
                                          Lepiota
                                          Camín que se mete pal monte
                                          Lepiota
                                           Lepiota
Pomares

Voi añadir unes semeyes d´unos pocos requexos máxicos que tovía se pueden ver en Perlora. Estos son de la fastera de la fonte Friera. Tamién unes semeyes de lepiotes que se dan per esos praos.

viernes, 8 de octubre de 2010

La nueche de los muertos vivientes

Tuve viendo güei la primer película de la historia que se torna a la llingua asturiana. Punxéronla con motivu de los actos de L´Arribada nel teatru "El Llar" de Les Vegues en Corvera y el so títulu como munchos yá sabréis ye "La nueche de los muertos vivientes". Lo primero quiero agradecer nel alma a Gonzali Producciones por permitime esfrutar d´una xornada, pa mi polo menos, peremocionante. Lo segundo, anque la película ye un clásicu del xéneru de terror o zombis a mi non me dio más por ella, tuve fixándome nes reacciones de la xente. La verdá non había muncha. Mal día y mal anunciao. Yéremos unes 20, 25 persones siendo xenerosos. A lo que vamos, les reacciones yeren de risa, a la xente dába-y risa. Y, polo menos al mio entender, esto ye bono. Pasó en toles llingües minoritaries cuando se entamaron a normalizar y se sacaron del so contestu llariegu pa metelu n´otru onde la xente nun ta avezada a escuchar la llingua que fala. Y eso ye lo que pasa. Da risa, la xente espegázase. Pasó col gallegu nos 80 cuando poníen la serie americana Dallas. La xente morría de risa cuando dicíen Xota Erre (JR) na tele pero ensin embargu pa reíse y falar de lo que vieren na televisión ellos tamién dicíen Xota Erre. Tamos nel bon camín, tamos nel camín de la normalización.

viernes, 1 de octubre de 2010

LLega la seronda

Entama ochobre. Llega la seronda digamos oficialmente. Vamos ver ya dientro poco les primeres llagarades y los primeros amagüestos nes escueles. Los neños esfrutando de la sidra del duernu y les castañes al son, les más de les veces, d´una gaita y un tambor. Les fueyes marrones y marielles per tolos requexos de parques, carreteres, quintanes y corraes, les calabaces enceses na víspora de tolos santos (non ye´l Hallowen ye daqué muncho más antigüu y asturianu), el samartín o la matada´l gochu... A min préstame la seronda y los sos vezos.

miércoles, 14 de abril de 2010

Curiosidaes

Resúltame abondo curioso que cuando les coses te van bien, tienes munchos collacios. Avérense a tí pa garrar anque seyan les migayes, como la rémora y el tiburcio. Pero si les coses entamen a nun salir como tú quiés, tamién me paez enforma curioso, que´l teléfonu dexa de sonar, los correos lletrónicos paren de llegar y alcuéntreste solu, bonu solu non, namái colos que de verdá t´aprecien y quieren. Ehí ye cuando ves los lleales. Nes bones y nes males. Ehí namái que queden los braeros, los de la to raza, los de la to sangre, los hermanos. Pero nunca lluvió que nun parare y cuando escampla´l cielu y les coses vuelven a dir por au tienen que dir, tamién me llama l´atención muncho, qu´el teléfonu torna a sonar, los correos vuelven llegar y hasta les invitaciones pa xintes y cenes de la mesma xente que te dexó tirao nos malos momentos. Pero too esto llévame a facer una reflesión, la llealtá y l´honor tan perenriba de tóu y pa finar préstame enforma esti dichu tan asturianu: na rula nun pregunten apunten.

miércoles, 24 de marzo de 2010

Sentimientu

LLegaron a Sevilla y namás baxar del autocar la xente yá taba presumiendo de País. Glayaben al altu la lleva que yeren asturianos y que como n´Asturies nun se vivía en nengún sitiu. Nel mediu de la cai Sierpes, a los pies de la Xiralda, echaben pestes porque non atopaben un chigre nel que vendieren sidra. La xente mirábalos raro pol so comportamientu y por como falaben n´asturianu. El problema ye qu´esi sentimientu de País, esi asturianismu, esa llingua de la que presumen, namái altravesar el Payares desvanezse como la nublina cuando sal el sol. Presumimos, los asturianos en xeneral, de grandones pero fuera de les nuestres fronteres. Si fuéremos igual fuera que dientro, otru gallu mos cantaría.