Hallowen non, Tolosantos o Samain sí

Los asturianos con una de les nuestres señes d´identidá más valoratibles como ye la fatura somos mui daos a recibir colos brazos abiertos a lo foriato y echar por tierra y desprestixar lo de nueso. Eso nun podía ser menos col "Hallowen" norteamericanu. Vayas per onde vayas tenemos "Hallowen". Bombones, calabaces, antroxos, mázcares, bragues, camisetes, tangues, llinternes y una llarga llista de coses de lo más bayuroso cola marca´l Tíu Sam. Pero equí salionos el tiru pela culata. El "Hallowen" nun ye más qu´el Samain celta, la fiesta de Tolosantos que se vien cellebrando n´Asturies dende tiempos inmemoriales. Pa entamar el "Hallowen" llevámoslo a lo qu´angüaño son los Estaos Xuníos de Norteamérica los emigrantes asturianos (sí los asturianos) y los irlandeses y agora lo que faen los americanos ye vendelu al mundu cola so visión particular. Ye abondo curioso, y enforma xente nun sabe, que la tradición de la calabaza ye asturiana n´esclusiva porque n´Irlanda lo que vaciaben yeren nabos y esto puede vese nidiamente na lleenda irlandesa de Stingy Jack que depués derivó en Jack O´Lantern o Jack el Llinterna. Mio güela cúntame, y nun ye d´una braña perdida en casa dios ye d´El Parruchu en Llabio parroquia de Perlora nel conceyu Carreño, que vaciaba calabaces colos vecinos y collacios y poníenles na quintana y nos cruces de los caminos. Vaciábenles bien, sacaben les mayores y meyores pepites pa semales o pa poneles al sol a secar y xintales, facien-yos unos buracos pa los güeyos, les ñarres y la boca. Depués nel de la boca poníen les propies pepites de la calabaza o palucos pequeños que facíen de dientes. Coles barbes del maíz podíen pone-y, si tiníen gracia, un bigote o na parte d´arriba de la calabaza unes trences, coletes o pelos desordenaos pa que diere más miéu. P´acabar metíen veles en dientro. Lo qu´avezaben comer de llambionada nestes feches yeren los "fritos de calabaza", casadielles, frixuelos y tamién, por supuestu, amagostaben castañes. Tamién avezaben a facer, igual que l´alborada´l día San Xuan, trastaes a los vecinos como camudar les portielles de sitiu, guardar los carros, etc. Tiníen tamién especial precuru en nun topase cola "Güestia" qu´esa nueche taba pasiando pelos montes y caleyes. De lo de los antroxos nun s´alcuerda bien y tampoco d´echar agua y comida a los difuntos pa que pasen de llargu y nun lleven a naide de la casa pero diz que dalgo-y suena. Voi siguir intentando que faiga memoria pero mientres tantu podemos siguir coles patoxaes hallowanianes.