Señes d´identidá

L´otru día tuve tomando un cafetín y almorzando con un collaciu que lleva munchos años trabayando por esta tierra, por esti benditu país. Ente paparáu y paparáu y taragañu y taragañu díbemos comentando coses personales de les nuestres vides y tamién falábamos de la situación política, social y cultural del mesmu. Nun intre de la charra salió la tema de les señes d´identidá de los asturianos y él díxome qu´había dos que destacaben por enrriba de les demás que son: la imbecilidá y la gochería. La imbecilidá ye una seña percaracterística dicía. Non hai más que ver como se apondera lo de fuera y se tira por tierra lo nuestro. Non hai más que ver como somos los más asturianos, los más grandones fuera de les nuestres llendes y lo nuestro ye lo meyor y, ensin embargu,  cuando tamos equí nin siquiera miramos pa ello. Yo escuchaba y asentía cola tiesta. Taba y toi d´álcuerdu con él dafechu. La gochería ye otra dixo. En cualisquier pueblu que pasé un ríu pel mediu lo que faen ye tenelu como un coral de llimpio, fáin-y un paséu curiosu, ígüenlu, adecéntenlu, les cases miren pal ríu y esfruten d´él y si te fixes bien dicíame él, eso equí nun pasa. Yo siguía asintiendo. Equí tiramos tola mierda al ríu, la parte d´alantre de les cases da pala cai y la trasera pal ríu pa nun ver la nuestra propia mierda. Cuando ya lu tenemos que nun puede con tola basoria que lleva tapámoslu y llamámoslu "canalizar" pa nun ver la llamuerga. Anque sepamos que sigue ehí queremos meyor nun lo ver como les avestruces. Yo namái que podía da-y la razón. Tien tola razón del mundu y más pa con ello tovía. Pero yo voi amestar otra seña identitaria más aparte de la imbecilidá y la gochería y ye l´autodestrucción. Los asturianos somos capaces d´autodestruínos como lo tamos faciendo y lo que ye más grave sabiéndolo. Sabemos qu´el camín que llevamos namái que nos lleva al estermín y non ye que sigamos por él ye que lu garramos con mas fuercia tovía. Somos capaces d´ello y vamos consiguilo nun tardando muncho. Venga a por ello.