Asturiana de Huevos

Esta historia que vos voi cuntar ye totalmente braera y tengo qu´agradecer l´enterame de la mesma al collaciu Alberto. Hai una empresa asturiana de nome "Asturiana de Huevos" asitiada´n San Cucao (Llanera) que se dedica a la producción y venta de güevos de pita. Esta empresa ta pasando por munches dificultaes y ta intentando xuntase con otra del mesmu ramu de la fastera de Valladolid. Les razones son cencielles. Fai dellos años había n´Asturies delles empreses que se dedicaben a la producción y venta de güevos. La política, en materia de contrataciones a déu pa los collacios y familiares del Gobiernu Asturianu, fizo que s´hinchare la bolsa funcionarial d´una manera apavoriante. Como estos trabayadores nun teníen nada que facer, recibieron órdenes de facer inspecciones a fondu de toles empreses. Y toco-yos a les de los güevos. Una por una fueron pesllando porque l´exércitu de funcionarios metíos a déu, con carné del partíu y del sindicatu, taben peresmolecíos poles condiciones d´hacinamientu de los pitos, polos metros cuadraos que teníen les xaules, pol estrés de les pites, porque namás que-y sacaben les cagarates tres vegaes al día y teníen que ser cuatru y porque nun teníen vacaciones pagaes na república Dominicana. La cosa ye que agora namás que queda "Asturiana de Huevos" que ta hasta los güevos y Asturies, angüaño, como nun ye autosuficiente´n materia güeveril, importa los mesmos del Brasil onde, por supuestu nun hai nengún control sobre los pitos o los güevos. A saber lo que xintamos agora. Manda güevos.

Barba Roxa

Garró´l trapu y llimpió´l sangre de la so barba roxa. De siguío, llimpió la corona d´oru y piedres precioses y guardola na alforxa. Yá nada diba ser igual pero nun pudo aguantar tanta provocación nin tanta acusación de racismu nin tantu llamar esplotador y negreru nin tanta quexa nin tantu vagueríu. Yá nun pudo más y matolu. Garró la corona d´enrriba la tiesta y pego-y tres cibiellazos que lu dexaron en sitiu. Dende esi día´l trabayu diben tener que repartilu ente´l de la barba blanca y él. Los Reis Magos pasaben a ser dos.

Un amagüestu en Grado

Esti pasáu vienres 28 d´ochobre fui tocar un amagüestu a Gráu. Subí pel Altu la Reigada y baxé hasta Candamu pa llegar de seguío a la capital del conceyu moscón. Ye un sitiu pol que me presta abondo pasar. Gústame´l paisaxe y préstame conducir perehí. Nun me gusten les autopistes y por eso escueyo rutes alternatives como esta. Pero nesta ocasión nun me llamó l´atención el perguapu paisaxe de la sierra de Bufarán sinón los cartelos de la toponimia de los pueblos pelos que vas pasando. Fai dellos meses podíes ver dos cartelos a la entrada de cada pueblu. Unu col nome real y otru con un nome irreal que los cazurros de turnu dicíen que yera´l castellanu. La llei d´Usu del Asturianu del 98 que diz que los nomes de los pueblos tienen que llevar namás el so nome tradicional incumplíase pero polo menos llevaben nunu de los dos cartelos el nome real de cada sitiu. Enantes podíes lleer: Llameiru/Llamero, Castañéu/Castañedo, Gurullos/Grullos, Gráu/Grado, etc. Agora l´incumplimientu de la Llei ye total porque la mio sorpresa fue pergrande cuando veo que camudaron dafechu les señales, cosa que nun facía falta y que costó unes cuantes perres nestos tiempos nos que dicen qu´hai qu´aforrar cosa que yo dubio, y punxéronles con unos nomes que naide conoz como: Grado, LLamero o Castañedo. ¿Conoz daquién a dalgún asturianu que diga Grado?

Problemes de conciencia

Tola vida lu tuvieren machacáu. Ficiéron-y la vida imposible, hasta lu echaren del trabayu pero agora tinía la gran oportunidá de vengase. Agora yera él el que garraba la payel.la pol mangu. Podía facer lo que llevaba años suañando. Agora yera´l que mandaba y xestionaba´l País y taba dispuestu a que´l lladroniciu pagare la so pena. De sutrucu entró-y un ataque d´honestidá, un aire de buenismu enllenolu cola fuercia d´una mani de les del arcu la vieya. Entráron-y dubies, problemes de conciencia. Esi tiempu perdíu fue la so sepultura y la de los d´elli

El zoquete

¿Como puedes ser tan zoquete? Desixes que desmigayen roses y tiren los pétalos delantre los tos pies pa tú pisalos con aironos de grandón. Eses gafes roses que lleves danme perceguera y los traxes que pones, nun se si naide te lo dixo, son lo más hortera que vi enxamás. Se que lo faes pa paecer más "cool" y pa llamar l´atención y pa subir el to caché pero a min nun me faes un res de gracia. Yes un zoquete y dígotelo porque a min lo que faiga esta sociedá tan políticamente correuta, y que s´empobina por mor d´esa correición al escobiu, esbáriame.

La voz de la viesca

Esti blogue tenía ´l nome orixinal de "La décima sinfonía". LLegome estos díes un corréu diciéndome que tenía que pagar perres por usar esi dominiu porque taba rexistráu. Lo que pidíen, la verdá, nun yera muncho pero como nun considero xusto que me pidan perres por rexistrar una cosa que yo yá venía usando dende fai dos años pues lo que fice fue camuda-y el nome al blogue. Dende agora pasa a ser "La voz de la viesca" asina cualisquier caminante que salga al monte y s´alcuentre perdíu namás que tien qu´agudizar l´oyíu pa escuchar la voz de la viesca y atopar el camín.

Paciencia

Depués d´un merecíu descansu, una gripe, un conciertu inolvidable nel New York Athletic Club de Nueva York y una bayura problemes, tamos otra vegada de vuelta dándo-y a la tecla. Venimos coles bateríes cargaes y con aire frescu y renováu pa un 2011 que se presenta perbonu y onde nun fai nada que xintábamos, los que les xinten, les uves y yá tamos finando´l mes de febreru. Lo más importante pa los prósimos meses va ser la paciencia. La paciencia ye una virtú y va haber qu´armase d´ella. Va haber que tener paciencia p´aguantar los tres meses de campaña elleitoral o precampaña o como lo quieran llamar que mos queden por delantre de los de siempres porque, si ustedes se fixen bien, son los mesmos dende va 30 años. Paciencia pa nun echar cálculos de cuanto cuesta esa campaña pagada por tolos contribuyentes cuando en realidá deberíen pagala los afiliaos de cada partíu. Paciencia pa ver como se ríen na cara d´unu cuando pela tele o la radio sal un anunciu que diz: "Asturias, lo dice todo el mundo" (colos sos perres tamién por supuestu). Paciencia pa nun garrar una pala dientes y llantáila a dalgún cuando tas escuchando´l partíu del Sporting y párenlu pa ponete un "Hecho aquí en Asturias. Gobierno del Principado de Asturias" un anunciu onde coles perres de toos publiciten empreses privaes. Va haber que tener paciencia muncha paciencia. Agora si, salga lo que salga´l 22-m nun quiero que me venga a protestar nin Dios. Ye lo que se votó y lo que merecemos.