Un amagüestu en Grado

Esti pasáu vienres 28 d´ochobre fui tocar un amagüestu a Gráu. Subí pel Altu la Reigada y baxé hasta Candamu pa llegar de seguío a la capital del conceyu moscón. Ye un sitiu pol que me presta abondo pasar. Gústame´l paisaxe y préstame conducir perehí. Nun me gusten les autopistes y por eso escueyo rutes alternatives como esta. Pero nesta ocasión nun me llamó l´atención el perguapu paisaxe de la sierra de Bufarán sinón los cartelos de la toponimia de los pueblos pelos que vas pasando. Fai dellos meses podíes ver dos cartelos a la entrada de cada pueblu. Unu col nome real y otru con un nome irreal que los cazurros de turnu dicíen que yera´l castellanu. La llei d´Usu del Asturianu del 98 que diz que los nomes de los pueblos tienen que llevar namás el so nome tradicional incumplíase pero polo menos llevaben nunu de los dos cartelos el nome real de cada sitiu. Enantes podíes lleer: Llameiru/Llamero, Castañéu/Castañedo, Gurullos/Grullos, Gráu/Grado, etc. Agora l´incumplimientu de la Llei ye total porque la mio sorpresa fue pergrande cuando veo que camudaron dafechu les señales, cosa que nun facía falta y que costó unes cuantes perres nestos tiempos nos que dicen qu´hai qu´aforrar cosa que yo dubio, y punxéronles con unos nomes que naide conoz como: Grado, LLamero o Castañedo. ¿Conoz daquién a dalgún asturianu que diga Grado?

Problemes de conciencia

Tola vida lu tuvieren machacáu. Ficiéron-y la vida imposible, hasta lu echaren del trabayu pero agora tinía la gran oportunidá de vengase. Agora yera él el que garraba la payel.la pol mangu. Podía facer lo que llevaba años suañando. Agora yera´l que mandaba y xestionaba´l País y taba dispuestu a que´l lladroniciu pagare la so pena. De sutrucu entró-y un ataque d´honestidá, un aire de buenismu enllenolu cola fuercia d´una mani de les del arcu la vieya. Entráron-y dubies, problemes de conciencia. Esi tiempu perdíu fue la so sepultura y la de los d´elli

El zoquete

¿Como puedes ser tan zoquete? Desixes que desmigayen roses y tiren los pétalos delantre los tos pies pa tú pisalos con aironos de grandón. Eses gafes roses que lleves danme perceguera y los traxes que pones, nun se si naide te lo dixo, son lo más hortera que vi enxamás. Se que lo faes pa paecer más "cool" y pa llamar l´atención y pa subir el to caché pero a min nun me faes un res de gracia. Yes un zoquete y dígotelo porque a min lo que faiga esta sociedá tan políticamente correuta, y que s´empobina por mor d´esa correición al escobiu, esbáriame.